حنا بدو عما عين العدو \\ للشاعر : طلال السعيد

قالت بدو
صدت وقالتها بقرف
بنت الأكابر والترف
متكبره متعاليه
يعني بدوي يقعد طرف
والمعنى دون المستوى ماحنا وياها سوى
حنا بنظرها من نكون ريشه يطيرها الهوى
بمفهومها حنا عدد رقم ولا أكثر بعد
يعني مجرد تكمله والا اهي أصل البلد
قالت بدو
يعني صفر على الشمال هذا على احسن احتمال
قلت أي نعم حنا بدو
حنا عما عين العدو
حنا البداوه طبعنا
واهل الوفا هم ربعنا
حنا بدو
أصل وفصل
حنا بداوتنا الاصل
ماهي بداوة تليفزيون
والا مسلسل اردني بس بدوي بالمكرفون
ولا هد سيفه ينثني
حنا بداوتنا تراث من جيل لا جيل انتقل
بالقمه حنا مو اقل
ماهم بدو بيت السدو
حنا بدو
حنا معاني ساميه
نروي السيوف الضاميه
نرد المنايا ما نهاب لو هي سعاير حاميه
حنا بدو
صعبين ونحب الصعب
اهل الخشونه والتعب
حنا يميزنا الوضوح
واذ اكرهنا ما نحب
حنا بدو
حنا البداوه عيدنا
ما ناكل الاصيدنا
مانعيش عالة مجتمع
نموت مانمد ايدنا
حنا بدو
حنا البداوه بدمنا
مانسمي احد عمنا حتى ولو منهو يكون لو هو زعل ماهمنا
ياتارسه وجهك صبغ ياتارسه عينك شدو
حنا بدو
حنا بداوتنا شيم دين وقيم طيب وظفر ومعنى كبير
يعني التمسك بالجذور ماهو التخلف والجهل ولا بعد حب الظهور ولا التنكر للاهل
حنا بدو
حنا بداوتنا شمم
فعل وكرم
مبدأ حضارات الأمم
حنا القمم
ولنا الفخر
لو عشنا ببيوت شعر عيشة ألم عيشة فقر عيشه تعلمنا الصبر مانحسب ايام الشهر
مانقترض
نشرب من الماي الهماج
نكحل نواظرنا بعجاج
ساعات مانلقى ذرا
يكفي نتلحف بالنجوم وفراشنا رمل الثرا وسراجنا نور القمر
لامن ظهر
نومن بقضانا والقدر
ماهو كسل
والا نعيش بلا أمل
نملك طموح علم وعمل
ونرعى الابل
ونرعى الغنم
ونعزف من الوانه نغم
ونتابع اخبار المطر
وندور الروض الخضر
نسري ورا برق سرا ولا نتراجع للورا
نبحث عن المرعى العشيب
ومن شعيب اليا شعيب مانستقر
عنواننا كل الديار
تجوالنا ليل ونهار
وهذي حياة الباديه
سنه ربيع سنه دهر
ورغم الفقر
نخاف من قولة افا ونتعب ورا قولة نعم
ونعيش عالين الهمم
نرعى الذمم
ناخذ من الصحرا الهدو لأنا بدو
يا تارسه وجهك صبغ يا تارسه وجهك شدو
ياللي تقولين بدوي
عزمي قوي
يبدا نهاري بالصلاه
واصارع امواج الحياه
محافظ على الخمس الفروض
واضح ولا احب الغموض
ماالتوي لأني بدوي
متمسك بأصالتي
ولا أغير لهجتي
أنا بدوي في فزعتي في جلستي في كلمتي في نخوتي
حتى عقالي ولبستي
ولو قلتي عني فوضوي
ماهمني
بالحيل يابنت بدوي
ويسرني
أعرف زين من أنتي ومن أنا
ويكفينا نعرف بعضنا والفرق واضح بيننا
أنتي مثل عمر الزهور مالك عمر شهرين ويجيها الجفاف وتندثر وتصبح الوانك باهته
وأنا جذوري ثابته
ياتارسه وجهك صبغ ياتارسه عينك شدو
حنا بدو
حنا عما عين العدو
كنا ولا زلنا بدو
وبنموت هم واحنا بدو
ــــــــــــــــــــــــــــــــــــــــــــ
للشاعر / طلال السعيد